काठमाण्डौंः नेकपा (एमाले) का अध्यक्ष एवं पूर्व प्रधानमन्त्री केपी शर्मा ओलीले देशलाई विकासको बाटोमा अघि बढाउन एमालेको एकल बहुमतको सरकार आवश्यक भएको बताउनुभएको छ । पार्टीको मध्यपहाडी लोकमार्ग अभियान अन्तर्गत दैलेखको राकममा आज आयोजित सभालाई सम्बोधन गर्दै उहाँले यस्तो बताउनुभएको हो ।
एमाले सरकारमा छँदा गरिबी घटेको, रोजगारी बढेको र युवाहरु बाहिर जानेक्रम घटेको दाबी गर्दै उहाँले भन्नुभयो, “एमालेलाई सरकारबाट हटाइएको अढाइ वर्षमा राजनीतिक रुपले देशमा अस्थिरता आएको छ, अराजकता छाएको छ । अर्थतन्त्र कमजोर बनेको छ र गरिबी, महंगी, युवाहरु विदेशिनु पर्ने अवस्था सिर्जना भएको छ ।” उहाँले प्रतिगमनतिर फर्किने कुरा गर्नेहरु लोकतन्त्रबिरोधी भएको पनि बताउनुभयो ।
उहाँले भन्नुभयो, ‘आज कोही प्रतिगमनतिर फर्किने कुरा गर्दैछन्, त्यो देशद्रोही कुरा हो । लोकतन्त्रबिरोधी त हुँदै हो, त्यो जनतालाई गरिव राख्न खोज्ने कुरा हो । आज लोकतान्त्रिक गणतन्त्रबिरुद्ध कसैले बोल्छ भने सोच्छ भने त्यो नेपाल र नेपालीका हितमा बोलिरहेको छैन, सोचिरहेको छैन ।’
एमालेलाई सत्ताबाट हटाएको अढाई वर्षमा राजनीतिक रुपले देशमा अस्थिरता आयो, अराजकता छायो, अनेक प्रकारका खराबी छाएको उहाँले बताउनुभयो । उहाँले थप्नुभयो, “यो अवधिमा अर्थतन्त्र चौपट भयो, गरिबी बढ्यो, महंगी बढ्यो ।” एमाले सरकारमा छँदा गरिबी घटेको उहाँले दावी गर्नुभयो । देशलाई विकासको बाटोमा अघि बढाउन एमालेको एकल बहुमतको सरकार अनिवार्य रहेको उहाँको भनाइ छ । जनता अहिलेको गठबन्धन सरसकारबाट वाक्क र दिक्क भइसकेको उहाँले टिप्पणी गर्नुभयो ।
