काठमाण्डौं : नेकपा (एस) महोत्तरीका अध्यक्ष कौशिलाल यादव नेकपा (एमाले) मा प्रवेश गरेका छन्। मंगलबार महोत्तरीको रामगोपालपुरमा पार्टीको क्षेत्रीय समन्वय समितिले दसैं, दिपावली तथा छठ पर्वको अवसरमा आयोजना गरेको शुभकामना अदानप्रदान तथा पार्टी प्रवेश कार्यक्रमकाबीच अध्यक्ष यादव नेकपा एमालेमा प्रवेश गरेका हुन्।
यादवलाई नेकपा एमालेका वरिष्ठ उपाध्यक्ष ईश्वर पोखरेलले स्वागत गर्दै पार्टी प्रवेश गराएका हुन्। सोही क्रममा नेकपा (एस)का जिल्ला सचिव अरुण कुमार चौधरी, भंगहा नगरअध्यक्ष किशोरी सिंह लगायत ३८ जना कार्यकर्ता एमालेमा प्रवेश गरे।
यता नेकपा माओवादी केन्द्र मधेस प्रदेश कमिटी सदस्य बैजनाथ यादवको नेतृत्वमा १४ जना कार्यकर्ताहरू पार्टीमा प्रवेश गरेको हो। नेपाली कांग्रेस लगायत अन्य पार्टीका प्रतिनिधिहरू समेत गरी कुल १ सय १६ जना नेकपा एमालेमा प्रवेश गरेको एमाले नेता शंकर महतोले जानकारी दिए।
कार्यक्रमलाई सम्बोधन गर्दै पार्टीका वरिष्ठ उपाध्यक्ष ईश्वर पोखरेलले मुलुकको आर्थिक समृद्धिको यात्रामा अगाडि बढाउनका लागि नेकपा एमाले नै सक्षम रहेको बताएका छन्।
अहिले आर्थिक रूपले संकटमा फसेको मुलुकलाई आफ्नो पार्टीले नै निकास दिलाउने बताउँदै अब मुलुक हाँक्ने समय आएको उपाध्यक्ष पोखरेलले स्पष्ट पारेका छन्।
