काठमाडौँ : खानेपानीमन्त्री प्रदीप यादवले काठमाडौँ खानेपानी व्यवस्थापन बोर्डले आवश्यक ऐन संशोधनका लागि अघि सारेको प्रस्तावलाई अध्ययन गरेर संसदबाट पास गराइने बताउनुभएको छ ।
काठमाडौँ खानेपानी व्यवस्थापन बोर्डको आज भ्रमणका क्रममा मन्त्री यादवले बोर्डले अघि सारेको प्रस्तावलाई मन्त्रालयका सचिव, कर्मचारी एवं बोर्डका महानिर्देशकसहितको टोलीसँग छलफल तथा अध्ययन गरी संसदबाट पास गराउने बताउनुभयो । बोर्डमा काम गर्ने क्रममा आएका चुनौतीको समाधान गर्न पहल गर्ने उहाँले उल्लेख गर्नुभयो ।
मन्त्री यादवले मन्त्रालय र बोर्डका कर्मचारीलाई आपसी सहकार्यका साथ काठमाडौँ उपत्यकामा बाहै्र महिना पानी उपलब्ध गराउने उद्देश्यका साथ काम गर्न निर्देशन दिनुभयो । भ्रमणका क्रममा उहाँले खानेपानी व्यवस्थापन बोर्डको इतिहास, गतिविधि, सञ्चालित कार्यक्रम, तिनीहरुको कार्यान्वयनको अवस्था र सो क्रममा आएका चुनौतीबारे जानकारी लिनुभएको थियो ।
“जनतामा उत्साह छैन । हामीले आफ्नो काम मार्फत निराशालाई उत्साहमा परिणत गर्नुपर्छ”, मन्त्री यादवले भन्नुभयो । उहाँले आफ्नो पहिलो प्राथमिकता शुद्ध पानी वितरण रहेको बताउनुभयो ।
