• असार ३०, २०८१ शनिबार
    13 Jul, 2024, Saturday

    नमोबुद्धले मनायो जुन ५, सडक नाटकद्वारा सन्देश प्रवाह


    २०८१ जेठ २३, बुधबार

    २०८१ जेठ २३, बुधबार

    विश्व वातावरण दिवसको अवसरमा नमोबुद्ध नगरपालिकाको भकुण्डे बजार क्षेत्रमा सरसफाई कार्यक्रम सम्पन्न भएको छ । नमोबुद्ध नगरपालिका, जनक माध्यमिक विद्यालय र सब डिभिजन वन कार्यालय, नमोबुद्धको आयोजनामा सम्पन्न भएको उक्त कार्यक्रममा ग्लोबल आइ.एम.ई. बैंक, लक्ष्मी बैंक, लुम्बिनी विकास बैंक लगायत वित्तिय संस्थाहरूले समेत साथ दिए ।

    सरसफाईको क्षेत्रमा नगरपालिकालाई अग्रपंक्तिमा रहेर सदैव साथ दिँदै आएका नेपाली सेनाले आजको कार्यक्रममा समेत बाक्लो उपस्थिति देखाएको थियो । नगरपालिकाका जनप्रतिनिधिहरू, कर्मचारीहरू, नेपाल प्रहरी, जनक मा.वि.का शिक्षक तथा विद्यार्थीहरू, राजनीतिक दलका प्रतिनीधिहरू र व्यवसायीहरूको सक्रिय सहभागितामा भकुण्डे बजार र राजमार्ग छेउछाउ  सरसफाई गरिएको थियो ।

    कार्यक्रमको प्रमुख अतिथि नगर प्रमुख कुनसाङ लामाले गरेका थिए । विशिष्ट अतिथिमा नगरपालिकाका उपप्रमुख रत्न बहादुर लामा, अतिथिहरूमा प्र.प्र.अ. शेष कान्त पौडेल, उपसचिव एवं शिक्षा शाखा प्रमुख कल्पना घिमिरे, वडा नं. १ देखी ११ सम्ममा वडा अध्यक्ष, विद्यालयका प्र.अ., नेपाली सेनाका प्रतिनिधि, बैंकका शाखा प्रमुख लगायतका व्यक्तिहरू थिए ।

    कार्यक्रमलाई सम्बोधन गर्दै नगर प्रमुख लामाले सरसफाई एकदिन मात्र नभएर सधैभरी नियमित रूपमा गर्नुपर्ने, वातावरणलाई प्रतिकुल पार्ने हाम्रो मानवीय स्वभावमा परिवर्तन गर्नुपर्ने कुरामा जोड दिए । त्यस्तै वडा नं. ७ का वडा अध्यक्षले व्यवसायीहरू व्यापार सँगसँगैसरसफाईमा पनि ध्यान दिनुपर्ने, आफ्नो पसल र घर अगाडी आफैले अनिवार्य सरसफाई गर्नुपर्ने विषयमा जोड दिए ।

    जनक मा.वि.मा अध्ययनरत विद्याथीहरूले एउटा गीत, एउटा नृत्य र एउटा सडक नाटक प्रस्तुत गरेका थिए । वातावरण प्रदुषणका मुख्य कारक को हो? त्यसको असर कसरी फैलिरहेको छ? समाधानको निम्ति के गर्न सकिन्छ र गर्नपर्छ ? भन्ने सन्देशमूलक सडक नाटकले सबैको ध्यानाकर्षण गरेको थियो । उक्त नाटकको रचना एवं निर्देशन सोही विद्यालयकी मा.वि. तह नेपाली शिक्षिका जुनु श्रेष्ठले गरेकी हुन् ।

    बजार क्षेत्रको सरसफाइ एवं सन्देशमूलक कार्यक्रम पश्चात प्रभातफेरी सहित जनक मा.वि.मा वृक्षरोपणको लागि पुगेको थियो । नगर प्रमुख, प्रमुख प्रशासकीय अधिकृत, वडा अध्यक्ष लगायतले  विद्यालयको परिसरमा वृक्षरोपण गरी कार्यक्रम समापन गरका थिए । उक्त कार्यक्रम जनक बहुमुखी क्याम्पसका सह प्राचार्य हरिहर अधिकारीले सञ्चालन गरेका थिए ।

    प्रतिक्रिया

    मिल्दो जुल्दो खबर