काठमाण्डौंः कैलालीको धनगढीमा भोली देखि शुरु हुने सुदूरपश्चिम महोत्सव २०८० को तयारी पूरा भएको छ । प्रधानमन्त्री पुष्पकमल दाहाल “प्रचण्ड” ले महोत्सवको उद्घाटन गर्नु हुने कार्यक्रम रहेको छ ।
आज धनगढीमा आयोजित पत्रकार सम्मेलनमा कैलाली उद्योग वाणिज्य संघका अध्यक्ष पुष्पराज कुँवरले महोत्सवको सम्पूर्ण तयारी पूरा भएको बताउनु भयो । महोत्सवको उद्घाटन प्रधानमन्त्री प्रचण्डले उद्घाटन गर्नु हुने निश्चित भएको उहाँले बताउनु भयो । प्रधानमन्त्रीले भोली मङ्सिर २२ गते मध्यान्ह साढे १२ बजे धनगढी उपमहानगरपालिका १ पशुपतिटोलमा महोत्सवको उद्घाटन गर्नु हुने तय भएको अध्यक्ष कुँवरले बताउनुभयो । महोत्सवको उद्घाटन समारोहमा प्रधानमन्त्री, सुदूरपश्चिम प्रदेशका प्रदेश प्रमुख, मुख्यमन्त्री, मन्त्रीगण, सरकारी अधिकारी लगायतको सहभागिता रहने उहाँले बताउनुभयो ।
महोत्सवको सुरक्षा व्यवस्थाका लागि महोत्सव स्थलमा सिसिटिभी सहित सुरक्षाकर्मी परिचालनको व्यवस्था गरिएको उहाँले जानकारी दिनुभयो । समृद्ध सुदूरपश्चिमको लागि आर्थिक समृद्धि भन्ने नारा रहेको सुदूरपश्चिम महोत्सवको यो १७औ संस्करण रहेको छ । मङ्सिर २२ गते देखि शुरु हुने महोत्सव पुस २ गते सम्म सञ्चालन हुने छ । महोत्सव सञ्चालनका लागि करिब २ करोड खर्च हुने अनुमान गरेको सङ्घले महोत्सव अवधिमा करिब १० करोड बराबरको कारोबार हुने जनाएको छ ।
सुदूरपश्चिम प्रदेशको उद्योग, व्यापार, कृषि, पर्यटन, कला, संस्कृतिको प्रवर्धन गर्ने उद्देश्यका साथ २०६३ साल देखि धनगढीमा महोत्सव आयोजना भइरहेको छ । स्थानीय खानपान, कृषि उपज, ब्यापार व्यवसाय, अटो मोवाईल्स, होटेल, सूचना प्रविधि लगायत गरि ४ सय स्टल रहेको महोत्सवमा कृषि प्रदर्शनी, कलाकारको प्रस्तुती, रमाइलो मेला, खानपानका परिकार, थारु गाउँ लगायत मुख्य आकर्षण रहने छन् । महोत्सवको करिब ५ लाखले अवलोकन गर्ने अनुमान गरिएको छ ।