दार्चुला, ९ कात्तिक । यहाँ पहिलो पटक स्त्रीरोग विशेषज्ञ डाक्टरहरूबाट सेवा दिन थालिएको छ। जिल्ला अस्पताल स्थापना भएयता पहिलो पटक स्त्रीरोग विशेषज्ञका रूपमा डा. स्मृति शाहीले सेवा थालेकी हुन्।
गत असोज ९ गते डाक्टर शाही जिल्ला अस्पतालमा हाजिर भएकी हुन्। २०४२ सालमा स्थापना भएको जिल्ला अस्पतालमा पहिलो पटक स्त्रीरोग विशेषज्ञ चिकित्सक आएको जिल्ला अस्पतालका सूचना अधिकारी डम्बरदत्त भट्टले बताए। “अहिलेसम्म स्त्रीरोग विशेषज्ञ जिल्लाले पाएको थिएन्”, भट्टले भने, “अहिलेका कार्यालय प्रमुखले निकै मेहनतका साथ स्त्रीरोग विशेषज्ञ भित्र्याउनुभयो।”
अहिलेसम्म स्त्रीरोग विशेषज्ञ नहुँदा महिला, विशेष गरी गर्भवतीलाई उपचारमा कठिनाइ भइरहेको थियो। स्वास्थ्य सेवाका हिसाबले दुर्गम मानिएको दार्चुलामा स्त्रीरोग विशेषज्ञ आउनु आफैंमा खुसीको कुरा भएको भट्टको भनाइ छ।
उनका अनुसार स्त्रीरोग विशेषज्ञ नहुँदा महिलाहरूले आफ्ना रोग लुकाएर बस्नुपर्ने अवस्था थियो।
उनले भने, “अब महिलाहरूका लागि सहज रूपमा उपचार लिन सकिने भएको छ, स्त्रीरोग विशेषज्ञ आएको बारेमा जानकारी सबैतिर गर्नु जरुरी छ, भारतका विभिन्न ठाउँमा जाने बिरामीलाई अब जिल्ला अस्पतालमै सबै सेवा उपलब्ध रहेको जानकारी जरुरी छ।”
जिल्ला अस्पतालका प्रमुख डा. रवीन्द्र भट्टराईका अनुसार स्त्रीरोग विशेषज्ञ ल्याउन निकै प्रयास गर्नुपरेको थियो। “म प्रमुख भएर आएयता निरन्तर प्रयासपछि अब हामीले स्त्रीरोग विशेषज्ञ ल्याउन सफल भएका छौं”, उनले भने, “आफू कार्यालय प्रमुख भएर आएर मात्र भएन, यहाँका नागरिकलाई सेवा दिन जनशक्ति व्यवस्थापन महत्त्वपूर्ण छ।”
आफूले जुन क्षेत्रमा गएर काम गरे पनि जनताको सेवा दिने गरी गरिरहेको उनको भनाइ छ।
भट्टराई भन्छन्, “दुर्गम क्षेत्रमा सेवा गर्ने मेरो रुचि छ, यहाँका नागरिकलाई सबै प्रकारको सेवा दिन म लागिपर्छु।”
यसअघि डा. भट्टराई कर्णालीमा सेवा गरेर आएका हुन्। “मैले चाहेको भए सुगम पाउँथे, काठमाडौंमै हुन्थ्यो”, उनले भने, “तर मलाई दुर्गम क्षेत्रका नागरिकको सेवा गर्नमा गर्व महसुस हुन्छ।”
अबदेखि महिलासम्बन्धी सम्पूर्ण रोगको उपचार तथा आवश्यक शल्यक्रिया जिल्लामै गर्न सकिने अस्पतालले जनाएको छ।
पहाडी क्षेत्रका महिलामा देखिने पाठेघर खस्ने, मुखको क्यान्सर, मासु पलाउने लगायतको शल्यक्रिया जिल्ला अस्पतालमै गर्ने गरी तयारी भएको छ।
स्त्रीरोग सेवा सञ्चालनका लागि अस्पतालले छुट्टै ओपिडी कक्ष र शल्यक्रिया कक्ष व्यवस्था गरेको छ। पहिले जस्ताे बाहिरै जानुपर्ने अवस्था अब अन्त्य भएको डा. भट्टराईले बताए।
“अब महिलाले कुनै रोग लुकाएर बस्नुपर्ने छैन, सहजै जिल्ला अस्पतालमै उपचार पाउन सक्नेछन्”, उनले भने।
डा. शाहीले यसअघि डडेल्धुरा, जोरपाटी र म्याग्दी लगायतका स्थानमा काम गरेका छन्।
“दार्चुला जस्तो विकट क्षेत्रमा आएर सेवा गर्न पाउनु मेरा लागि गर्वको कुरा हो”, शाहीले भने, “यहाँका महिलालाई सकेसम्म बढी स्वास्थ्य सेवा दिन चाहन्छु।”
अस्पतालमा अहिले तीन विशेषज्ञसहित दश चिकित्सकले सेवा दिंदै आएका छन्। कुनै समय दुर्गम जिल्लाका अस्पतालमा चिकित्सक पाउनै मुस्किल थियो तर समय बदलिंदै जाँदा अहिले दुर्गम क्षेत्रमै चिकित्सक सेवा दिन आउने क्रम बढेको छ।
अस्पतालमा शल्यचिकित्सा (अर्थोपेडिक) विशेषज्ञ, दन्त चिकित्सकसहित पाँचपाँच मेडिकल अधिकृत पनि छन्।
अस्पतालमा भौतिक पूर्वाधारको अभाव भए पनि हालको संरचना व्यवस्थित गरेर सेवा प्रदान गर्ने काम भइरहेको डा. भट्टराई बताउँछन्।
उनका अनुसार नयाँ अस्पताल भवन निर्माणमा ढिलाइ भएकाले अहिले पुरानो भवनमै व्यवस्थापन गरेर सेवा चुस्त र प्रभावकारी बनाउने प्रयास भइरहेको छ।
दुर्गम क्षेत्रमा सबै चिकित्सक आउन नचाहे पनि उनीहरूलाई प्रोत्साहन गरेर ल्याउने काम भएको कार्यालय प्रमुख भट्टराईको भनाइ छ।
अहिले जिल्ला अस्पतालमा छात्रवृत्ति करार, प्रदेश करार र ‘निकसाइमन’ को सहयोगमा चिकित्सकहरू कार्यरत छन्। अस्पतालमा अहिले तीन अल्ट्रासाउण्ड मेसिन सञ्चालनमा छन्। बिरामीको चाप दिनप्रतिदिन बढ्दै गएको छ।
अस्पतालका सूचना अधिकारी डम्मरदत्त भट्टका अनुसार यही कात्तिक ३ देखि ७ गतेसम्मको अवधिमा मात्र १५१ जनाले उपचार सेवा लिएका छन्। “तिहारको बिदाका समयमा पनि बिरामीको सङ्ख्या घटेन”, उनले भने, “विशेषज्ञ डाक्टर आएपछि बिरामीको आगमन पनि बढेको छ।”
यसअघि दशैं अवधिमा ३९२ जनाले उपचार गराएका थिए। अहिले तीन विशेषज्ञ चिकित्सक भएपछि भारततर्फबाट समेत बिरामी आउने क्रम सुरु भएको सूचना अधिकारी भट्टले बताए।
उनले भने, “यदि महिला विशेषज्ञ र एमडिजिपी चिकित्सक कार्यरत रहेको बारेमा अझ प्रचारप्रसार गर्न सके ग्रामीण भेगका बिरामी पनि थप आउने सम्भावना छ, धेरैलाई जिल्लामै विशेषज्ञ चिकित्सक कार्यरत भएको जानकारी नहुँदा बाहिर जानुपरेको छ।”
यहाँका बिरामी भारतको हल्द्वानी, पिथौरागढ र धारचुलाका मेडिकल तथा अस्पतालमा उपचारका लागि जान्छन्। रासस
