धरान (सुनसरी), १३ मङ्सिरः इटहरी उपमहानगरपालिका–१ स्थित राष्ट्रिय माध्यमिक विद्यालयले आफ्नो ७०औँ वार्षिकोत्सवका अवसरमा ९५ जना विद्यार्थीलाई छात्रवृत्ति वितरण गरेको छ ।
विद्यालयमा स्थापना भएका ३७ वटा अक्षयकोषमध्ये दाताले उपलब्ध गराएको रु २७ लाख बराबरको अक्षयकोषको ब्याजबाट प्राप्त रकम छात्रवृत्तिका रूपमा प्रदान गरिएको विद्यालयका प्रधानाध्यापक सरनकुमार बस्नेतले जानकारी दिनुभयो ।
विद्यालयले शैक्षिक तथा सहशैक्षिक गतिविधिमा उत्कृष्ट प्रदर्शन गर्ने विद्यार्थी तथा शिक्षकलाई समेत सम्मान गरेको छ । उत्कृष्ट शिक्षण गर्ने शिक्षकमध्ये खगिनकुमार चौधरी, सागर कट्वाल र युनिसा बस्नेतलाई नगदसहित सम्मान गरिएको उहाँले बताउनुभयो ।
त्यसैगरी विद्यालयमा बढी उपस्थित हुने शिक्षक तथा विभिन्न विधामा उत्कृष्ट कार्य गर्ने अन्य शिक्षकलाई पनि सम्मान प्रदान गरिएको थियो । वार्षिकोत्सवका अवसरमा भौतिक तथा शैक्षिक विकासमा योगदान पु¥याउने नौ जना व्यक्तित्वलाई मरणोपरान्त सम्मान गरिएको विद्यालयले जनाएको छ ।
उक्त वार्षिकोत्सव कार्यक्रममा विद्यालयले आर्थिक वर्ष २०८१-८२ को वार्षिक आय तथा व्यय सार्वजनिक गर्दै रु चार करोड ८८ लाख ९६ हजार १४६ आम्दानी र रु चार करोड ८७ लाख ५० हजार ७२ खर्च भएको विवरण प्रस्तुत गरेको थियो । रासस
